EL MAS SHARANFONFON TRENO DEL MUNDO
Es Agatha Christie, la famoza autora de munchas novelas policiacas ke dyo a konoser al mundo el Orient Express. Oy en diya, dayinda, es el suenyo de los muy rikos para viajar de manera la mas luxuoza possivle, pasando por las vistas inkreyivles de ermozura de los lagos, las montanyas, los rios i los vedres puevlos de los Alpes, kon un servisyo digno de reyes i reynas….. El interior art-deco del treno no es diferente del briyo de un palasyo i las suitas son dottadas de todo el konforte ke la persona puede dezear. Los servitores son profesyonales, vistidos kon elegansa i guantes blankas. Al presyo del viaje es inkluido kaviar i champagne i platos rafinados sin limito por gente de la alta sosyetad ke pueden pagar por seguro presyos tan altos!
Los viajes kon el Orient Express empesaron a la “Belle Epoque” en 1883 kon la Kompanyia WAGONS-LITS i duraron fina el 12 de Deciembre 2009 kon el treno ke salyo de Strasbourg i yego a Vienna.
La linya Paris-Budapest (Hungaria) i Paris-Bucharest (Romania) no funksyono mas dospues de 1977 i los trenos para Istanbul kedaron en 1960…. Los trenos de alta velositad los remplasaron por ser muncho mas rapidos i baratos sin duda !
No es difisil de imajinar akeyos tiempos nostaljikos de loskualos se relatan la fasinasyon kon el “Assasinato en el Orient Express” por egzemplo (1934) …. Las dammas tan elegantes kon sus fostanes de seda, largos, kon la talya estrecha, plumas, dantelas, samaras, chapeyos siempre i djoyas para eksitar el selo de las otras mujeres…. Los hombres vistyendosen el smoking i el frak durante el viaje ! La mas grande bovedad del mundo es tomar en konsiderasyon lo ke “las otras” pensaran, kontaran ets…. No pensan si va agradar a los hombres ma a sus amigas….. Ke lokura ! En mi manseves la mas ermoza manseva, o la ke atrayeva los ijikos lo mas, era una muchacha modesta, kon ermozos kaveyos largos, ermozos ojos i un puerpo kon talya fina, goliendo un buen shavon, vistida simplamente i sin dinguna ekstravagansya, makiyada lo manko posivle…. Una ijika ermoza no tiene menester de artifisyos i ke pekado ke son estas las ke lo mas keren fardarsen, vistirsen kon markas karas i son las mas avyertas !
Siento ke me eskarinyo de la pudor de las mujeres de los 40-50 i la gentillessa i el respekto ke los hombres teniyan por estas mujeres….
Nada troko en los sentimientos i en el komportamiento de la mujer i del hombre entre akeya epoka, mas antes i en muestros diyas…
El Orient Express viajo siempre de Paris a Munich, Vienna i Budapest. El treno ke lo remplaso des de 1919 el Simplon Orient Express, empeso su viaje en Fransa (Calais), Paris, Lyon, Milan, Venice, Trieste, Zagreb, Belgrad, Sofia, i Istanbul para terminar. Se puediya yegar a Athena si los pasajeros lo dezeavan… Al empesijo el treno se metiya en kamino kada diya de Paris para Istanbul. Ma dospues era solo tres vezes a la semana.
OY ?
Por seguro ke se puede viajar kon treno de Londres a Istanbul !
El itineraryo de 2000 milas ~ (3220 km) en 3 o 4 noches seriya London-Paris-Munich-Budapest-Bucharest-Istanbul. o : London-Paris-Munich-Belgrade-Sofia-Istanbul.
Kedarse en una de las estasyones es siempre posivle para kontinuar dospues kon un otro treno. Ademas kon el Eurostar oy se puede vijitar todas las destinasyones en Europa !
Oy en diya se puede viajar kon el Venice Simplon Orient Express de Londres a destinasiones fina unos 25-30 horas por 3.500 Liras Inglezas i otras destinasyones komo Londres- Istanbul, 5-6 diyas empesando de 7.000 Liras Inglezas i mas. El treno parte de Londres a Venezia una vez a la semana, del empesijo de Marso fina Novembre.
Los mizmos trenos viajan a Singapore, Malaysia & Thailand,
De Singapor a Bangkok tres diyas i dos noches 7.250 USA Dolars por personas en kamaretas por 2.
De Bangkok a Singapore kuatro diyas i tres noches. El ke viaja solo paga 5.440 USA Dolares en un kompartimento de Pullman.
Los bilyetos se pueden merkar direktamente de la kompanyia BELMOND o kon Railbookers.
Eskrivyendo estas linyas me topi sonyando i viajando en uno de estos vagones majikos, mirando por la ventana a los pikos de nieve debasho del sol i akeyas fermas tan pitoreskas de la Europa central, a los patos nadando en las kalmas aguas de los lagos komo espejos….. Me vino esuenyo i ire a durmir kon las manyifikas panoramas ke vide oy !…..
Layla tov !
Artículos Relacionados: