Shabat 12 Marso vinites al mundo komo todos
A este mundo kon misteryos de diferentes modos.
Yo me siento el responsable de toda tu vida,
De tu vinida, tu salud, prosperidad o kayida.

****

Tu dependras de mi estado i mis futuros dias
Seras a mi bazado para ke yores o ke riyas.
Vinites al mundo a este mundo de grande misteryo
Para unos paradizo, para otros semiteryo.

****

La velada de tu vinida paso muy doloroza,
No se si tu vida seria horoza o penoza.
Kon mi kerensya arivo a enfloreserte? ken save?
Kreo ke para tus rizas o tus yoros es la yave.

****

I sin padre s’engrandese un ninyo en la famiya,
En abrigo de su madre, en abrigo de su tiya.
Ma la egzistensya de akel padre sera tu braso,
Su entelijensa i su kerensya seran tu paso.
Su nombre,su reflo para ti es un grande koraje
La mitad de una vida un padre lo vale kaje.

****

Pensi al mal destino de un alesho de tu lado,
Espantozo de no kumplir mi ovra ovligado.
Una tremblor me sinti en esta vida ke yo yevo,
Te bendigo por un buen destino kon karinyo yeno.
Oy si me espanti de la muerte es por ti solo,
Tu vinida me dyo alegriya, tu sos mi konsolo.

****

En mi korazon i mente seras mi penseryo puro
Yo bivere por ti solo, kon mi alma te lo djuro.

Compartir
Artículo anteriorIsrael joins U.S. in dumping UNESCO over ‘Bias’
Artículo siguiente¿Cómo será el mundo cuando venga el Mesías?
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.

No hay comentarios

Leave a Reply