Diario Judío México - Estuve ayi del 12 al 14 Marso, todos dias de luvia, para prezentar el filmo “Trees Cry for Rain: A Sephardic Journey” (Arvoles Yoran por Luvia: Un viaje Sefaradi) ke se mostro en alhad, el 13 Marso, a las 15:00, en el sinema “Panpacific AMC Theatre 9”, uno de los 30 filmos de 10 paises ke se presentaron en el Festival de Filmos Judios. (http://www.seattlejewishfilmfestival.org/ )

En primero vos eksplikare la razon ke este filmo – un dokumentaryo viejo (de 1989) i kurto (36 minutos) fue deskojido, mas djusto dezir “akseptado” para este festival ande jerneralmente preferan filmos muevos kon aktores i/o estoryas. Ya savesh ke en Seattle biven munchos sefaradim de Turkia i Rhodes. Munchos de eyos ya konosian el filmo, o lo avian merkado de anyos antes, kuando salyo en forma de video-kaset (VHS.).

Ma Al de Jaen I Evelyn Blatt no lo tenian visto. Eyos estavan en muestro grupo de Ladinokomunita en Espanya en Oktubre de 2010, i lo vieron por primera ves en el otobus, kuando lo mostraron en kamino de Madrid a Segovia. Les agrado tanto, ke desidaron a propozarlo para el Festival de filmos. El komite lo aksepto solo despues ke lo vieron. ( Aki los rengrasyo a Al i Evelyn por sus idea, i por la ospitalidad halis sefaradi ke me dieron en Seattle.)

La prezentasion

El dia del filmo avia un “Purim Bazaar” en la sinagoga Ezra Besaroth (de los Rhodeslis) ma aun kon esto 120-140 personas, kuaje todos sefaradis (entre eyos munchos konosidos mios), vinieron al sinema. A la entrada avia una meza kon unos biskochos maraviozos para todos!

La direktora del festival, Pamela Levitt, anunso ke iva aver un otro filmo kurto yamado “Miracle Lady” antes del mio, I despues me presento a mi.

“Miracle Lady”, filmiko de 10 minutos echo kon animasion de kuklas, estava muy ermozo! Tratava de dos mujeres viejas ke estavan siempre asperando, asta ke un milagro viejo les troka sus mazal. Ke relasion tenia kon el tema sefaradi? Las mujeres tenian nombres sefaradis (Fortuna i Marcela-Merkada) I los produktores eran sefaradis. (http://www.seattlejewis/ )

Por introduksion de “Trees ….”, yo konti en kurto los azardos ke avrieron el kamino para la realizasion de este filmo en Oakland (serka de San Francisco), djusto antes ke pasaramos a bivir en Dallas. Despues de aver bivido en los (Kansas City i St. Louis) por 20 anyos kaje sin konoser ni un sefaradi, yegi a Oakland en 1982 ande en los primeros dias enkontri a Paulette Sevi, una Sefaradia de Salonik, i a su marido Izak, ke kantava al stilo turko una maraviya, i kon tiempo a todos sus konosidos ladino-avlantes. En 1985 fondi el klub “Los Amigos Sefaradis” ande preparavamos programas kada mez. La sinematografa Bonnie Burt asistia a muestros programas, asta ke un dia me kijo azer una entrevista kon mi, i despues desido azer el filmo. Para el dia ke iva venir el ekipo de filmar a mi kaza, enviti a mi amiga Esther Levy (orijinaria de Ejipto) ke no solo giza, ma kanta muy ermozo. I por azardo, akel dia vino Judy Frankel, de bendicha memoria, la kantadera kon boz kristalina, ke uzava venir ande mi para praktikar la pronunsasion djusta de los biervos de las kantikas.

Reaksiones

Pamela avia dicho ke despues del filmo la djente me podian demandar kestiones o dar sus reaksiones. Kuando se eskapo el filmo, todos kedaron asentados en sus lugares sin menear! La primera reaksion fue ke “el filmo esta muy kurto.” Uvo munchas kestiones – sovre mi vida, sovre los djudios de Turkia en dia de oy, sovre Ladino, i mas.

Isaac Azose, el hazan emerito de Ezra Besarot, me demando por el biervo “moye” ke esta en la kantika “Arvoles Yoran por Luvias” ke kanta Esther. Estavamos todos komo una famiya. Kerian todos gozar del tiempo endjuntos, I darsen a konoser a mi.

Salimos a un kafe ande kontinuimos muestra konversasion. I en fin, Pamela Lavitt disho ke al anyo ke viene eya va trayer a lo menos kuatro filmos sefaradis al Festival de filmos djudios de Seattle!

Afuera, la luvia kontinuava.