Keridos Amigos
Saviyash ke Marc Chagall era un pintor judyo ke se yamava Moishe Zakharowitch i ke nasyo en Rusya en Vitebsk, el 7 Julio 1887 ?
Paso a la nasyonalitad franseza en 1937 i se muryo el 28 de Marzo 1985 en Saint-Paul de Vence.
Chagall kon Picasso era de los mas famozos artistos ke se establisaron en Fransa en el siglo XX. Su ovra, enteramente independente de kualker eskola, se atribua “surrealista” i “primitizmo muevo”. Su identitad judiya se puede klaramente ver en su ovra ande figuran la egzistensya en Shtetle (kazales judyos de la Europe del Este) i el folklor Ruso.
Chagall a parte de su ovra pintada fue rekonosido ke un autor de poeziyas i un artisto de vitray ! Un muzeo se ha fundado a su nombre en Nice Fransa.
” Si kada vida tiene una fin, devemos koloriar la muestra kon las kolores de muestros amores i muestra esperansa ! ” eran sus biervos
” El amor de mi mama era tan grande ke para provarlo tuve ke lavorar muy duro ” tambien.
“Mi sirko es en los sielos “, “la guerra”, “la kruz blanka”, ” la tres kandelas”, “la kuchara de leche”, “bevienta del soldado”,”e lgayo”, “la orasyon del judyo”, “el aniversaryo”, “el ponte de Passy”, “la soledad” , “la immolasyon de Isaac”, las gravuras del opera Garnier en Paris, “el hbombre ke korta pan”, “la Madonna del Kazal”, “Enamorados i las flores” “Enamorados aryento de los lilas” , ” la mujer kazada i el assoplador “, “los pontes ensina del rio la Seine”, “Los enamorados ke bolan i el buketo de flores”, “Adam i Eva”,
“Jesus kitando los judyos de Egypto !” , “Un pintor en el lunar” , “delantre de una pintura”, “El violonisto”, “el angelo pintor”, “oyir el gayo”, las vitrayes de la iglesya Tudeley son sus ovras mayoras.
——————————————-
Deke vo lo eskrivi esto ?
Nebil i su espoza vinyeron ayer para azerme una sorpreza de PURIM ! Fiesto semana entera kon eyos a mi lado …. Mi alma kanta de felisitad !
Nebil ama muncho Chagall i tiene freskas suyas en sus ventanas…. Son transparentes por seguro ! A mi me kaye el kapak ! No me plaze todo esto sharonfonfon i fantezisto a parte de las kolores manyifas…… No me entyendo es poko dizir ! A el le plaze….
Su mujerika, una pelota de seda, mi kerida Melissa, no le plaze tambien ma esta tanta en edmirasyon delantre de el (lokuras de amor ahhhh !) ke mizmo si metiya el desino ke el ijo del lechero izo a sinko anyos iva dizir ke es una ovra de arte maraviyoza ! Las ijikas ! Va i entyendelas! El Di-o ke los alegre komo me alegraron a mi ! Me yora la alma para ke vayamos (i kon los gatos !) a Inglaterra. Pya lo tengo todo en regla ma vinid ver ke yo i mi santo korason no estamos dispuestos por agora!
No se si esto sera posivle… Veremos ! Me desho ir kon el koryente… No me importa mas ande bivo ! Basta el minimum ke tengo de menester ! Ke lokura era lo de antes… Me paresiya ke la vida nunka va eskapar ! Planos, azer mas i mas planos, merkar…dezear… ver i mas ver…. El mundo me viniya chiko ! No kaviya en dingun lugar ! Todo era poko i kaliya mas alkansar… Mas lavorar… Mas ganar…. Tener mas.. Agora bivo el kalmo de lo dospues de las tempestas !
Ke kalmo, ke serenitad……Ke maraviya es de bivir, de desharse bivir a lo largo de los diyas… Be keyf ! Torni a mis 12 anyos ! Bivo mi chikes i mi entusyasmo delantre de kada kozika la mas chika… Tomo plazer de kolores, de jugetes, de historyikas de ser amada i de dar mi immenso karinyo ! EL bleu de los sielos, los pasharikos, todas las plantas, las frutas, la mar, el sol i la luvya….. La tierra me enkantan ! No tuve tiempo en mi manseves de observar esto todo i gozar…
No bastante ! Es agora ke me inche de sentimentos maraviyozos i un kanto de adorasyon se assuve de mi para el Kreador de tanta ermozura…
Les di a komer…Verduras komo les plaze ! Se namoraron !
Son komo chikitikos ke se van a la eskola primera ! La kaza me se alegra de sus rizas, del bruido ke azen para bivir ! I yo era ansina ? No me akodro ! Estan tan ermozos ! Paresen a los artistos… De verlos kon jeans i bluzikas de koton kon mangas kurtas en invyerno (nunka tienen friyo !) sin un gramo de grasa en sus puerpos antrenados de tanto sport, dingunos diran ke este es un profesor i la otra (28 anyos !) una akademista akumplida !
El mundo troko ! En mi tiempo, personas ansina eran seryozos, repozados i no komo estos mitad trololos ! Amanyana me los va yevar al merkado lokal ! Ke veygan lo ke es merkado ! Una abundansya ke no tengo visto en dinguna sivdad… Kuando estava en Israel preferiya irme al Shouk (Lod – Ramleh – Carmel) kuando puediya evitar el Supermerkado ! Lo tengo todo delantre de mis ojos. Ke alegriya era ! Guadri este plazer. Dayinda me enkanta…
Ke pasesh una buena nochada (o demanyanada para los unos…)
Karinyozamente
[email protected]
Artículos Relacionados: