Te huites a un riko, yo un pintor no famozo,
So un ombre infeliz dezesperado sin gozo.
Kon kolores mas kayentes dezeyi desinarte,
Nunka pensi en tela o en un karton pintarte.
Te gravi en mi korason,ize mi sinyatura,
A este kuadro ke refleta tu hermosura.
Me mata la kolor de sielo ke ay en tus miradas
Yenas kon dulsuras divinas estan dekoradas.
A esta hermosura luz divina kije darte,
Durante mi vida para pueder posesionarte.
Kon estos ojos lindos deseyo a ke mi mires
Estando aryento de mi,para ke me enspires…
A tus lavyos di la kayentura de tus sonrizas,
Dekori las miradas kon el gozo de tus rizas.
Pinti tus ojos,tu figura kon bivas kolores
Para no olvidar tus karesos i nuestros amores.
En toda mi vida dekoraras kon tu prezensya
Kayentaras mi alma,alargaras mi egzistensya…
Acerca de Haim Vitali Sadacca
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.
Artículos Relacionados: