Entre los artikolos ke meldi en el Salom de 7 de mayo, uno era sovre la fiesta de Hidrellez en Turkiya. (Lo vo eksplikar mas abasho.) Ma del mezmo artikolo (eskrito de Sami Aji) embezi ke ay tambien una fiesta ke se yama Kakava ke se fiesta en Edirne, ke es komo Hidrellez, i ke estas fiestas oganyo vienen en la mezma data del Lag BaOmermuestro.
Yo nunka tenia sintido de Kakava. Fui a Wikipedia a meldar: es una fiesta de los Roma (zinganos, komo dizimos mozotros) ma la estorya es kuaje egzaktamente a la muestra de la salidura de Ayifto – de opresion en Ejipto, de fuyirsen kon un “salvador” (sin nombre) segidos por la armada del Firavun (Paro) ke topan fin en aogandosen en la mar.
Siguro ke para mozotros esta es la estorya de Pesah, i el “salvador” muestro era Moshe Rabenu. Para eyos es la fiesta de Kakava, i sus salvador no tiene nombre, ma esperan ke va venir demuevo a salvarlos (!)
En Edirne fiestan el Kakava, en aziendo una grande lumbre (“bonfire”, hoguera en espanyol) saltando por ensima, i despues muzika, kantes i bayles. (No parese al Lag Baomer de Israel???)
Hidrellez (o Hidirellez) se fiesta en toda la Turkia i en kaje todos los paizes muslumanos, i dizen ke es el dia ke se enkontraron los dos profetas: Hızır (Al-Khidr) i Ilyas (ke es muestro Eliyahu Anavi.) Es fiesta de primavera, muy alegre, kon pikniks i fiestas grandes en la natura.
I, komo mensioni, estas dos fiestas (Kakava i Hidrellez) i Lag BaOmer oganyo kayen al 6-7 Mayo.
Podian ser de Israel en Lag BaOmer, no? Ma (a lo menos la primera) es de Kakava.
Artículos Relacionados: