Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora Radio J tyene un sityo internet. Agora mis emisyones se pueden oir en el mundo entero indose sovre Radio J kon internet ( http://www.radioj.fr/node/145 ) sea en direkto, sea kuando se kyere: mis emisyones (kuando el tekniko lo kyere byen) son enrejistradas a mi nombre.
Vos akodro tambyen ke el proksimo atelye de konversasyon de la asosyasyon Vidas Largas se tendra el lunes 2 de fevrero de las tres a las sinko en el Centre Communautaire; ya konosesh el adereso, no es menester de darlo en estos tyempos.
Oy pensi de avlarvos de Le Chambon sur Lignon, un kazal franses de un poko mas de 2.500 moradores, ke obtuvo de Yad Vashem la medaya de djusto, lo ke afito solo dos vezes: este kazal i el kazal de Nieuwlande en Hollanda. A parte del kazal el mismo, munchos de sus moradores i de los kazales vizinos (kaji 70) obtuvyeron la medaya de djustos de manera individuala.
Kale saver ke la povlasyon de este kazal, ke se topa en medyo de la Fransya, en el departamento de Haute-Loire, es en mayoriya protestante. I esto fue una razon muy fuerte del ayudo de la povlasyon a los djudyos (i no solo a djudyos).
Se deve de saver ke, en septyembre i oktovre 1783, este kazal protestante fue aharvado por lo ke se yamo las dragonadas, kijo dizir askeres katolikos ke forsavan los protestantes de konvertirsen al katolisismo, por torturas, kemaduras, rovo, i todo modo de persekusyon. En otros lugares, la krueldad de las persekusyones izo ke syenes de miles de protestantes se konvirtyeron al katolisismo. Ama la povlasyon de Le Chambon rezistyo. Dos anyos mas despues, el 18 de oktovre 1685, el rey de Fransya Louis XIV, balda el edikto de Nantes firmado por su papu Henri IV, i la relijyon protestante es proibida en Fransya.
Los pastores se fuyen en otros paizes protestantes komo l’Almanya (ansina fue kon el padre de Jean-Philippe Baratier, el ijiko de onze anyos ke izo la traduksyon en franses del Livro de los Viajes, de Binyamin de Tudela) ama lo mas de la povlasyon no tyene las paras bastante para pueder fuir, i se keda en Fransya, azyendo su relijyon a eskondidas.
En 1702 empesa una rebuelta de los protestantes, yamada la gerra de los Kamizardos, porke yevan solo una kamiza. El rey embiya kontra eyos muevos askeres, i despues de 8 anyos de lucha, en 1710, todos los los Kamizardos van a ser matados o embiyados a las galeras.
Toda la primera mitad del siglo 18 va ser una epoka de persekusyones terrivles kontra los protestantes eskondidos. Una mujerika, Marie Durand, kedo famoza por ser metida en prezo durante 38 anyos. Eskrivyo sovre una pyedra de su prezo: “rezistir”.
Es solo en 1787, dos anyos antes de la Revolusyon, ke Louis XVI eskapo las persekusyones kon un edikto dicho de toleransya. A esta okazyon, vos akodro ke este mismo rey disho a su ministro Malesherbes, ke aviya lavorado para este edikto:” fuites mi protestante; agora vas a ser mi djudyo”. I de fakto Malesherbes empeso de okuparse del kavzo de los djudyos de Fransya, ama vino la Revolusyon antes ke tenga tyempo de eskapar lo ke aviya empesado. Son los revolusyonaryos ke van a dar los derechos de sivdadanos fransezes a los djudyos (i ke van tambyen, poko despues, a kortar la kavesa del povereto de Malesherbes, de su ermana, de su ijja, de su yerno, de su inyeta i de sus dos sekretaryos).
Puede ser estash pensando ke esto todo mos alesha del Chambon sur Lignon i de su rolo en favor de los djudyos durante la gerra. Si pensash esto, vos yerrash, porke es la memorya biva de las persekusyones ke sufriyeron sus antepasados ke fue una de las razones por las kualas toda la povlasyon en djuntos del kazal se apiyado de los persegidos en jeneral i de los djudyos en partikolar.
Ama ensima de esto kala saver ke la povlasyon fue dirijida por tres pastores i sus mujeres ke le dyeron la buena palavra.
Estos tres pastores se yamavan André Trocmé, (i su mujer Magda) Edouard Theis (i su mujer Mildred) i Charles Guillon, ke, despues de aver sido su pastor, era el Mayor del kazal.
Empesaremos de avlar del pastor André Trocmé, nasido en 1901 en Saint-Quentin, en el norte de la Fransya, de padre franses i de madre almana. Durante la primera gerra, es manseviko, su sivdad es okupada por los almanes i se apersive ke son ombres komo los otros. El dechida de azerse pastor i, su vida entera, va luchar para la amistad entre los puevlos, inkluyendo los puevlos alman i franses. Va konoser a su mujer Magda, una italyana de Firenze ke tyene su edad, en un viyaje en Amerika, aboltan en Fransya. El va ser pastor en el Norte, i aya su lucha por la rekonsilyasyon entre Fransezes i Almanes despues de la Primera Gerra lo aze mal ver de una parte de su povlasyon, tambyen de sus kapos en la iglesya protestante, ke, por pizma, lo embiyan en 1934 – de una syerta manera es una punisyon – en el kazal del Chambon sur Lignon. Aya se va kedar asta 1949.
Aya aze la konosensya de un otro pastor, Edouard Theis, nasido en 1889, dunke unos 12 anyos mas aedado ke el, i ke tyene las mismas ideas pasifistas i non-vyolentas ke el. Trocmé funda una eskola yamada el kolejyo cevenol (ke dainda egziste) i demanda a Theis de dirijirla, ayudado de un syerto Roger Darcissac para la chika eskola.
Por sus amigos almanes se ambeza las persekusyones ke sufren los djudyos en Almanya, i yene es kontra la gerra. Ama kuando esta empesa i kuando los almanes entran en Fransya, el i Theis ambezan a la povlasyon del kazal ke kale luchar kon las armas del espiritu kontra el totalitarismo, en una rezistansya morala i sivila. Ama yene Trocmé keda kontra la lucha armada por lo ke es de si mismo.
La primera refujyada ke vyene en Le Chambon sur Lignon es una djudiya almana ke se va ver a Magda Trocmé, ke la embiya al mayor de la sivdad, Charles Guillon, el kual no save ke azer, i Magda la toma en el presbitaryo del templo.
Los Trocmé se organizan para arrekojer lo mas posivle de refujyados venidos de todas partes de Evropa, djudyos i non djudyos. En el kavo de 1940, Trocmé se va ver a los pastores amerikanos – en este tyempo Amerika es dainda neutra – para akompanyarlos en los kampos de enserramyento i ayudar a los prezoneros.
Le Chambon sur Lignon syendo una estasyon turistika, tyene 9 oteles, 38 pensyones de famiya, 9 kazas de kriaturas. Trocmé se va esforsar de yenarlos de refujyados. Para konvenser sus ovejas de akojer, i, si kale, eskonder a refufyados, les akodra komo la Biblia avlava de sivdades refujyo, i sovre todo, komo los djudyos son sus primos, el puevlo eskojido de la Biblia. I lo ke dize kuadra a estos todos kampesinos ke tuvyeron antepasados persegidos dos siglos antes i ke no lo olvidaron.
El 10 de agosto 1942, manko de un mes despues del aferramyento de masa del Vel d’Hiv (16 de julyo) el kolejyo cevenol es vijitado por Lamirand, sekretaryo de Estado a la Mansevez del governo de Vichy . Los elevos del kolejyo le dizen ke van azerle una deklarasyon. I delantre el ministro estremesido, meldan lo ke sige: “No azemos diferensya entre judyos i non djudyos. Es kontraryo al ensenyamyento evanjeliko. Si muestros haveres, ke tyenen por sola kulpa de ser nasidos en una otra relijyon, resiviyan el orden de desharse deportar o mismo solo nombrar, dezobedeseriyan a los ordenes resividos, i mozotros mos esforseriyamos de eskonderlos lo mijor posivle.”
Son naturalmente los pastores Theis, direktor de la eskola, i Trocmé, ke an inspirado a los elevos de dizir tal koza. I Trocmé vyene dizir al ministro de Vichy: ” No savemos lo ke es djudyo, solo konosemos ombres.”
Kuando dize esto, ay unos 150 djudyos en el kazal, espartidos entre kazas partikolares o kazas de refujyados. Trocmé ya entendyo ke lo ke se disho no va kedar sin konsekuensa, i pishin aze eskonder a todos los djudyos.
Lo ke se asperava vyene afitar: el 26 de agosto 1942, dos semanas despues de estas deklarasyones, la polisiya vyene para aferrar a todos los djudyos. Ama todos ya aviyan sido eskondidos i la polisiya no topa ni uno.
Las organizasyones de rezistansya sivil se esforsan de travar lo mas posivle de djudyos internados en los kampos de Vichy en la Fransya dainda no okupada por los Almanes, en primero las kriaturas, despues las madres si es posivle. Una vez travados, kale topar un lugar para guadrarlos, i Le Chambon sur Lignon es uno de estos lugares. No el solo, por siguro.
No kyero tampoko pretender aki ke solo fueron los protestantes ke ayudaron a djudyos. Es vedra ke mi padre fue ayudado por su amigo protestante Alfred Legal, ama yo fui eskondido ande una katolika en vedra sin relijyon, Mme Sauty, i tambyen ande dos katolikas muy kachofas (sufus) Mme Gasset i Mme Carayol. Ande eyas yo durmiya kon un hach este boy arriva de mi kama…
Esto dicho, aboltaremos en el Chambon sur Lignon, una vez ke, despues de novyembre 1942, los Almanes entraron en la zona non okupada.
El 13 de fevrero 1943, de muevo vyene la polisiya, ama franseza, i esta vez son aferrados por los djandarmas Trocmé, Theis, i Darcissac, el direktor de la eskola chika. Van a ser liberados tres semanas despues, ama ya se entendyo ke ay muncha sekana, i Trocmé va ser ovligado de eskonderse el mismo en djulyo 1943, i va kedar eskondido asta la liberasyon un anyo mas despues.
Kale dizir ke antes de esto, un primo de André Trocmé, Daniel Trocmé, ke dirijiya una kaza ande se eskondiyan refujyados, a sido aferrado por la Gestapo, i deportado en Maidanek kon 19 de sus estudyantes, i aya se va morir. Solo 8 de sus estudyantes van a sovrebivir.
Malgrado esto todo la povlasyon del kazal, protestantes o katolikos, kontnuan de eskonder a la djente persegida, djudiya o no. No es kolay de saver kuantos fueron akojidos i eskondidos, ama se pensa ke fueron entre 2.500 i 3.000.
Despues las organizasyones de rezistansya sivil se van a esforsar de azer pasar djudyos en Suisa. Ay dos djizes de organizasyones: las organizasyones protestantes: Cimade, YMCA, Quakers, Darbystos. Tyenen atadijos kon paizes ajenos komo la Suisa.
Ama ay tambyen las organizasyones djudiyas, ovligadas por siguro de lavorar a eskondidas: por egzemplo la OSE, los scouts djudyos, i munchas otras.
Afillu ke Le Chambon no es serka de la frontera, los protestantes i los djudyos organizan el viaje, ke no es kolay, de azer pasar los djudyos asta la frontera suisa, i de azerles pasar esta frontera. Va ser mas kolay asta septyembre 1943, porke la frontera es guadrada por Italyanos ke achetan munchas vezes de serrar los ojos. Va ser muncho mas yuch despues, kuando la frontera va ser guadrada por los Almanes.
En esto todo, todos los kazalinos del Chambon o ayudaron o saviyan ke los otros ayudavan, i no uvo nunka dinguna desnonsyasyon astal kavo de la okupasyon.
Por lo ke es de la rezistansya armada, kale dizir ke su lavoro era de arondjar los almanes de Fransya. La Rezistansya armada no izo nada para salvar a los djudyos. Dingun treno de deportasyon fue sabotado por la Rezistansya, por egzemplo.
Si es siguro ke la rezistansya armada ayudo de manera indirekta a los djudyos en permityendo mas presto la ida de los Almanes i la Liberasyon, no uvo ayudo direkto de la rezistansya armada a los djudyos durante la gerra. Son otras organizasyones non armadas ke los salvaron. Kuando digo los salvaron, no todos, malorozamente, yene uvo 76.000 deportados sovre los kuales solo 2.500 se sovresalyeron. Esto dicho, si aviya 330.000 djudyos en Fransya al empesijo de la gerra, esto kyere dizir ke la mayoriya de los djudyos de Fransya se salvaron.
Vos tengo de dizir ke despues de la gerra, Trocmé no troko de sus ideas pasifistas, i va luchar asta su muerte (en Suisa en 1971, a la edad de 70 anyos) para la rekonsilyasyon kon los Almanes. En 1961, eskrivyo un livro intitolado: “Jesus-Christ i la revolusyon non vyolenta”.
Vos dishe, empesando mi emisyon, ke el kazal de Le Chambon sur Lignon obtuvo de manera kolektiva la medaya de los djustos. Kale saver ke esto fue una koza muy eksepsyonala, syendo ke la ley israelyana en vedra no lo permetiya, deviya ser por personas i no por sivdades. Ama komo todo los moradores de la sivdad se auneron para salvar a tantos djudyos, la sivdad obtuvo esta eksepsyon, i muncho tyempo fue la sola, asta ke, komo lo dishe, el kazaliko de Nieuwlande en Holanda obtenga la mizma medaya, por las mismas razones: los 117 moradores se dechidaron en djuntos ke kada uno teniya de eskonder i salvar a una famiya djudiya, i lo izyeron todos en djuntos.
A parte del kazal de Chambon, munchos de sus moradores ovtuvyeron la medaya a titolo personal, empesando por todos los ke nombri:
- El pastor AndréTrocmé
- Su mujer Magda
- Su primo Daniel Trocmé
- El pastor Edouard Theis
- Su mujer Mildred
- El pastor Charles Guillon, mayor del kazal
- Roger Darcissac
I munchos otros. Si keresh konoser sus nombres, abasta de bushkar sovre Google: AJPN Le Chambon sur Lignon.
Aki me vo kedar porke ya vino el tyempo de eskapar mi emisyon, i vos digo
Al djueves ke vyene, si kyere el Dyo!
Artículos Relacionados: