Aze unos sinkuenta anyos antes, en las sivdades importantes de kada paiz, no avia el karar de restorantes ke existen en muestros días i de las diskotekas no se tenia haber. Los amigos, para frekuentarsen i englenearsen se djuntavan en las kazas. Las aktividades ke mas muncho se dezvelopavan eran echar lashon, komer un bokado i baylar. Para lo primero abastava kon tener ganas de avlar i oyir lo ke kontavan los amigos. Para lo segundo avia dos alternativas: el ke ofresia su kaza para la fiesta, merkava todo lo ke era menester para komer i bever, lo dava de baldes o demandava las paras a kada uno, divizando el total de gastes por la kantidad de personas ke arivaron. En Chile teníamos otro modo: kada uno dezia lo ke iva aparejar i se lo dava al balabay de la kaza onde se azia la fiesta; esto lo yamavamos “malon”, palavra ke viene de la lengua mapuche, el mapugundun.
Los bayles eran kon muzika ke estava a la moda. Lo demode o “bayat” era refuzado, ma avia tambien los ke eran konosidos komo los “klasikos” i no kedavan de ser aktuales: los “rapidos” ke se baylaban en el empesijo de la fiesta i los mas “lentos”, ke se baylavan avagar, kuando se empesava la noche o se amatava la luz, estando kara kon kara (cheek-to-cheek).
La muzika venia en los yamados “diskos de asetato”. Los de boy mas chiko tenian el numero 45, los grandes o long-play eran 33 un tersio, los ke se topavan en el medio, 78, ni chikos ni grandes. Tenian un burakito en medio para meterlos en el gramofon. Kalia tener el kudio de uzar la alguja djusta, apropiada al disko, i si uno se yerrava el sono se oyia “komo la estreya de Djoha”. Las algujas pedrian kalidad i kalia trokarlas por otras muevas.
Kuando moravamos en la kaleja Jose Domingo Cañas de Santiago, entre los anyos 1955 i 1961, teniamos komo vizinos a la famiya Libedinsky i el ijo, Pablo, ke se iva a la eskola ebrea, le plazia invitar a su kaza a los kamarades i amigos del kartier para tener fiestas kon bayle. Las djovenas se vestían bien elegantes, todas kon kostumes. Ainda no se metían pantalones, la moda era de fostanes kurtos, por enriva de los djinoyos. Los ombres tenian kravatas i djaketas, ke se kitavan todos enduna en la fiesta, kuando era dado el sinyal.
Los kalsados alimpiados i briyantes komo espejos; si mankava tiempo para pasarles boya, se echava un poko de eskupitina i se fregavan en el pantalon de la pierna kontraria.
Onde Pablo el bayle se azia el dia de shabat, de las tres i media de la tadre fina las mueve de la noche. Kuando vinieron todos, el primer mansevo ke le demandava a una djovenika “keres baylar kon mi?”, i aresivia un “si” komo respuesta – era el empesijo de la fiesta. Ama, antes de esto kalia kitar el tapete, metiendolo en un kenar, para deshar libre “la pista de bayle”. Otra koza ke se azia presto era meter senizeros por todos lados, siendo ke munchos fumavan i no kalia echar las sinizas embasho.
Para komer se aparejavan chikos sandwiches, gatós de krema i de shokolata, dondurma, kafe kon leche, bevidas gazozas, ma nada de likor. Todo se metia enriva de la meza i kada uno iva tomando lo ke keria. Balones de
kolores auflados se enkolgavan en lugares altos i kuando la fiesta estava por eskapar los azian patladear. Todos eran muy seriozos, en jeneral no avia esmodramiento. Se azian kozas de chikez, komo enkashar un pedaso de buz en
la aldikera o adientro del fostan de la ke estava baylando; meter la mano enriva de la siya, djusto kuando la manseva se iva asentar. Se averguensavan i no baylavan si un grande entrava al salon a echar un ojiko.
A la sala de tualet las djovenas entravan endjuntos para komentar lo ke se pasava en el bayle: ken flirtea o “pincha” kon ken, si se dieron un beziko…
Endemas se pasavan papelikos eskritos de la una a la otra i los meldavan en el kabine. Kuando se azia las mueve venían los padres kon sus otos a tomar a las ijikas. Yegando a kaza, lo primero era kitarse los kalsados, para deshar deskansar a los pies ke estavan auflados de tanto baylar.
En akeyos anyos se oyia muncha muzika amerikana, empesando por el rey del rock and roll, Elvis Presley i pasando por otros komo el sefaradí Neil Sedaka, Paul Anka, Doris Day, Brenda Lee, i munchos mas. En las fiestas no mankavan los ke les plazia azer el lavoro de ir trokando los diskos del gramofon
Una de las primeras kozas ke merko mi padre, kuando la famiya ya se avia instalado en el paiz, fue un grande aparato de radio de la marka RCA Viktor ke endemas tenia gramofon i se oyian los diskos kon kantigas en turko ke se trusheron en el vapor, kuando arivaron a Chile en 1949. Por exemplo, “Bir Rumeli Dügün Havasi”, o “Anadolu Kadin Oyunu”. A mi madre, komo buena mujer sefaradí, le agradava oyir muzika espanyola i kuando gizava las iva kantando. Me akodro de “El bezo”, kon Los Churumbeles de Espanya, “Doze Kaskaveles” de los Ruisenyores del mizmo paiz. A mi me plazia el kante “El Negro Zumbon” al ritmo del bayon, kantado por Silvana Mangano. Bushko a akodrarme i me viene la muzika de Luis Mariano kon su “Ilusion” o Tito Rodriguez kantando “Me lo disho Adela”. En Chile estava de moda un kantante ke se izo muy famozo en Mexico, yamado Lucho Gatica, i por las radios se oyia kada nada. De tangos avia los de Gardel i Alberto Castillo kon su orkesta tipika.
Ke akontesia kon la muzika halis sefaradí? Ainda no avia los Pasharos Sefaradis para salvar del ulvido a las kantigas ke se ambezavan en forma oral, de una jenerasion a la otra, desde aze unos kinientos anyos, i de muestra jenerasion kaje i no avia ken podia kantarlos.
Artículos Relacionados: