“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
EL JURNAL IMPAGADO
Una persona de Sfat se fue a una sivdad i se alkiló[1] en kaza de un balabait por tres anyos. En fin del tiempo, ke era erev Kipur, le disho a su balabayt:
- Págame mi sekirut[2] , ke me kero ir a mi kaza a mantener a mis ijos
Le disho el balabayt:
-No tengo as[3].
Le disho:
- Dame frutas del kampo a komo valen en la plasa.
Le arespondio el balabait:
-No tengo
Le pide:
- Dame algún pedasiko de kampo i yo toparé a venderlo.
-No tengo, arespondio el duenyo.
- Dame algunas behemot[4]
-No tengo.
-No tengo.
Al kavo se enfasyo de ir demandando, viendo ke en todo le respondía: “No tengo”, i él ya savía ke ninguna de ditas kozas le mankaban. I ansí se fue a su sivdad mofinado[7] sin ningún bien.
Después de moed[8], tomó el balabayt en su pecho kantidad de moneda ke le devía de su sekirut[9], i más tomó tres behemot: una kargó komida, i una de vino i otra de frutas, i se fue a Sfat i pozó en kaza de su moso. Después ke komieron i bevieron, le pagó su sekirut por entero; i le preguntó:
-Kero ke me digas: Kuando me demandates ke te page i te dishe yo ke no tengo moneda, ¿en ke me sospechates es tu korasón?
Le arespondió diziendo:
- Te djuzgé le-kaf zehut[10] kon dezir entre mí: “- Puede ser ke topó alguna merkansía i la empleó toda i se kedó sin moneda, i por ser erev Kipur no topa a ken vender un poko de eya para pagarme”.
-Kuando me demandates alguna behemá i te dishe: “No tengo”, ¿en ke me sospechates?
- Dishe: “- Puede ser ke las alkiló a otros i no puede tomárselas asta ke venga su tiempo.
-Kuando me demandates algún kampo i te dishe: “No tengo”, ¿en ke me djuzgates?
- Dishe: “- Puede ser ke dyo sus kampos a los guertelanos i se ingualó kon eyos por tantos kilones al anyo, de ke se yama ke no son suyos”.
-Kuando te dishe: “No tengo frutas”, ¿en ke me sospechates?
- Dishe: “- Puede ser ke aínda no kitó ma’asher[11] de eyas i por esto no me da frutas, siendo es erev de Kipur i no ay tiempo de kitar ma’asher.
-Kuando te dishe: “No tengo ni kavesales ni menderes”, ¿en ke me djuzgates?
Le respondió diziendo:
- Dishe entre mí: “ – Puede ser ke izo kodesh[12] toda su azienda”.
Entonses le djuró el balabait, diziendo:
–Be Emet ke ansí fue, ke toda mi azienda la ize kodesh por kavza de mi ijo, ke no trabashó en la Ley; por esto no kije aprovecharlo de mi azienda, i kuando fui onde mis haverim, ke son los hahamim de la parte de daróm[13], me izieron hattará[14] el neder[15]. I asegún tú me djuzgates le kaf zehut, ansí me djuzgue el Dió, Bendicho sea.
———————————-
[1] Uzado komo “se empiegó”
[2] Alkiler/sueldo
[3] La moneda turca mas chika, el centavo
[4] Animales
[5] Almohadas
[6] Minder (t.) Litera, colchon
[7] Perturbado
[8] fiesta
[9] Alkiler, salario, sueldo
[10] djuzgar favorablemente
[11] Diezmo
[12] Santo / Santidad
[13] Sur
[14] Anulación
[15] Voto, promesa, ofrenda prometida
——————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo I: Kuentos de Kulli
Artículos Relacionados: