UN RETORNO AL PASADO
Kuale es un viaje a Espanya ? Un retorno al pasado ? Un pelegrinaje ? Komo si se kompletava una koza ke kedo enkolgado en el tiempo… ? Todo esto i una maraviyoza eksperyensya turistika! Un keyf para los ojos, unas vakansyas para las mientes i los puerpos kansados… Un paseo ande el arte tiene su primer rolo kon ovras de grande valor, monumentos ekstraordinaryos, las ermozuras de los montes i de los rios, de los jardines, de las fuentes, de las sivdades i de la kampanya… De la lingua, mi lingua para mi ! De los bayles i de los kantes ke nunka me enfasyaran !
Uno de los mas ermozos payizes Mediterraneos i del Atlantico tambien… Kon una historia fasinante, eksepsyonal de krualtad, de heroizmo, de sufriensyas i de gloria, de rikezas i de povretad, de derrotas i viktoryas…. Muy interesante….
Toledo
ToledoYo so Sefaradita, dunke me siento el produkto de estas tierras komo ansina lo sintyeron mis antesedantes ke fueron egzilados de Sefarad la dulse, a los payis Balkanes i al Medyo Oriente…. Por siglos no se olvidaron de sus vida aya, de todo lo ke sufyeron i todo lo ke gozaron tambien.
Es muestra tierra madre, muestra boz, muestra emosyon !
Kedara muestra sangre todo el tiempo ke los sefaradis seran parte de su historia. Espanya es mi enerjiya sin fin, un amor i una alegriya ke asemeja a un “randez-vous” kon un amante eternal i esto seguro ke muy munchas personas sienten komo mi, sin pueder ekspresar sus sentimientos a mi manera….
Artículos Relacionados: