“”Deskripsyon De Un Ombre Selozo””
Siempre tuvo selo de la vida de sus serkanos,
Su visyo le amato las alegrias de sus anyos.
Los dias le pasan triste,su aspekto mutrozo,
Komo sifuera estar kon su persona ravyozo.
****
No puede dar gozo a su familia,ni el goza,
Su sangre esta entusigada a grande doza.
Sus falsas sonrizas eskonden su hipokrizia
No kreyas a lo ke dize,ni a lo ke dizia.
En su aparensya ay una vista enganyoza
Su avla no es sensera,la mas parte danyoza.
Es pretansyozo,en el se ve ayres de grandeza,
Kuando te ve en la kaye de las karas te beza.
****
Su visyo es verte desfamado i en proveza
Se sela de tu fama, de tu salud i rikeza.
Su selo lo empuja a ver el entorno malorozo
Se siente alegre kuando los ve leshos de gozo.
Sus karas son eskondidas kon un eskuro velo,
Es hazino de hipokrizia i yeno de selo.
Su korazon insansible le dikta un modo
Sus visyos,su boka lo transmeten en otro modo.
Bushka los kaminos para aronjarte a un lodo
Por todos tus aktos sos arebasho en todo.
****
Tu enemigo esta en tu vida,a tu lado,
Nunka esperes ser apresyado o estimado.
No apresyes la persona a baza de su pareser,
Su valor esta en su karakter i solo en su ser.
Mas vale alesharmos de los serkanos selozos,
Para bivir feliz i sin pierder nuestros gozos…
Haim Vitali Sadacca
Montreal.
Artículos Relacionados: