[email protected]
Oct 16, 2008
Sharopika,
Komo se giza aroz savroso? Yummi yummi.
Yo komi ande una Ashkenazia amerikana un aroz muy savrozo. No se kon kualo lo mesklo ! Siguramente ke no era aroz simple. Puedeser tambien ke la kualitad del aroz es importante… A mi me plaze el aroz ke sale uno a uno. No komo el aroz kinezo ke deve de ser apegado i blanco komo el sharope. Si me akodro devia de aver dos ingredients ke le trokan la semsele en koziendo, por siguro sevoya i mushrooms si no me yerro, ama me agradaria si una Madame Gourmet me daria su resefta de “gourmet rice”
Mersi a l’avance i Hag sameah a todos. Te rogo Sharope ke me koriges el Ladino i traduizes los biervos ajenos.
David Hazzan–Chef sin chapeo.
Denver CO. Estados Unidos
——————————————————————————-
Kerido David,
Estamos en el mupak tu i yo agora para guizar AROZ !
El simple :
Mete agua a buyir…Nesesitamos 3 kupas !
2 kupas de aroz, lavado bueno i eskurrido/drained
En la kaldera de teflon tuya de aroz (Kolor kolorada le yakishea mijor !)
Mete un kuarto de kupa de azeyte de oliva kon una kuchara de manteka
Echa el aroz aryento + sal
Sofriyir el aroz fina ke se emblankeska komo el sharope.
Meter las 3 kupas de agua buyendo. Emleskar una vez serrar la kaldera kon el kapak/cover no lumbre fuerte. Kuando empesaremos a ver burakitos ensima del aroz pishin pishin azer lumbre chikichikitika. Meter una tovaja entre la kaldera i el kapak i deshar ke se aga una ermozura !
ESTO ES LA BAZA
—————————
Para azerlo “gourmet” tenemos de enrikeserlo kon savores, kon engredientes, de maneras diferentes. LA BAZA NO TROKA.
——————————————————-
IC PILAV
Sofriyir las sevoyas finamente kortadas,
echar el aroz sofriyir
pimyenta preta,
muy poko de kanela,
pinyones,
pasikas,
medya kuchara de asukar,
i al lugar de agua, kaldo de poyo o karne
Uzamos esto para inchir domat, piperushka, sevoya, ojas de kol, ojas de vinya, poyo o akompanyar una komida de karne. Se le puede kortar finamente ojas vedres al aroz… Yo lo ago.
———————————————
Para el PILAV DE BODAS a la ora de echar el aroz en el azeyte echamos kayisi (mishmish/apricot /albaricoque seko) i prunas pretas sekas kortados en chikos pedasoz kon almendra enblankesida (deshada en la agua buyendo fina ke se le pueda kitar la kashkara) una kuchara de miel o de dulse de kayisi.
(Se puede guizar tambien kon sevoya sofrita)
Se sierve tambien allado de poyo o karne.
————————————————————-
Para el MUDJADDARA ARABO
Lo emleskas kon lentejas vedres dospues de kozerlo
Muez rayada i polvo de cinamon
—————————————————————
Para el AROZ DE LAS ISLAS a la ora de echar el aroz en el azeyte echamos pedasoz de ananas,muy chiko kortado poko de karota i piperushka (korolada-vedre-oranj-preta) frutos de las konfituras sin el kaldo, prunas dulses freskas kortadas, i pistachio rayado por ensima
—————————————————————
Para el AROZ DE FIESTAS a la ora de echar el kaldo buyendo de poyo o karne ensima del aroz sofrito echamos pimyenta preta, cholopatos, ilgados i korasonikos de poyo KOZIDOS i kortados chikos, pasikas pretas i pinyones, verdura finamente kortada.
(Se puede guizar tambien kon sevoya sofrita)
——————————————————–
Para el AROZ DE SHABAT
Dospues ke se kozyo el aroz preparar lo ke se va meter ensima.
Bezelya/petit pois/green peas kozidos (a la vapeur) allado del aroz.
Para ensima : Friyir lunas grandes de sevoya i pimyentones vedres (alimpyados aryento) – azer eskurir bueno el azeyte ensima de una tovaja
Meter tambien champinyones freskos al grill – sekos sin kaldo –
————————————————
Para el AROZ TURKO
Servirlo kon FASULYAs blankas sekas (fijones)
o NOHUT (Pois chiche, garvansos)
kozidos kon sevoya i sos tomat, kon o sin karne o
Servir lo kon lamelas de berendjena frita (kon sos o sin)
Sofriyir el aroz kon fide/vermicelle
Karinyozzzzzzzzzzzzzz
Sharope kon el chapeyo de chef kon pishkul !
Artículos Relacionados: