Me akodro de la vendimia "ha ktifa " en Israel ande un kollego miyo produiziya uvaz para la eksportasyon i era TNUVA ke viniya a tomarlas del kampo ande unos sinkuenta lavorarantes inchiyan las uvas a los sestos.....?  Yo adorava irme i estar kon eyos, ayudarlos i fiestar kon eyos todos, la famiya, los amigos i las ijikas i los ijikos ke lavoravan muy duro en las vinyas... Era un plazer ke no se puede eksplikar....

Baylavamos i kantavamos al deredor de la lumbre fina tadre en las noches... Muevas amistades empesavan.... Las karnes ke asavamos inchiyan de umo i de golor la fiesta ! Los perrikos korriyan a selebrar kon mozotros i se artavan i eyos de todo lo ke sovrava de karne i de poyos...

Los unos durmiyan aya mizmo muertos kansados.  Los otros pensavan a la demanyana i komo se ivan a meter a lavorar de muevo ensima de esta kanserya... La manseves kome la kanserya. Es vedra !

Unas kuantas horas de esuenyo bastan a rekuperar las fuersas i sintirse "muevo" dospues de una douche a la demanyana...

Para mi era banyo, vistirme i presto korrer a ser la respektavle dirijante en mi echo !!!  No durava muncho.... Tratava de kaver en la seryozitad ma no tomava muncho tiempo para de mueve tornar a "lo ke so !" ma mi lavoro nunka sufriyo de mi personalitad kon "kolores

diferentes !" i.... me amaron grasyas al Di-o. Lavori 17 anyos kon eyos, todo el tiempo ke estuve en Israel..... Alegre i felis...

Si, las uvas... i la vendimia al empesijo de Septembre... Un enkanto i todos komiyamos lo ke puediyamos.... Yo aziya "dolmas" de las ojas de vinya ke inchiya de todo bueno !.  Kalderas yennas para todos.... Goliya sevoya i no saviya komo kitar esta golor de ensima de mi kuando me iva al echo !!!! De murir de riza....Tantos limones, kolonyas i kremas ke se gastavan para esta "golor" !!! Mizmo mi perriko se askeyava a vezes !... Ma... A mi me plaze la sevoya i el ajo i no me deranja del todo. Topo ke es muy feminino i muy agreavle.... Me gustan todas las golores de la kozina porke penso ke es el paradizo de las hanumikas....

Los festivales de la vendimia son muy koloriadas i muy divertidas.  Se esperan el anyo entero dospues de un duro lavoro para obtener el mijor produkto.  Des de miles de anyos estos festivales se selebran kon muncho enthusiasmo i pasaron a los livros de historia.  El mas selebro era el festival del vino de Bacchus.

La ovra  "El Triumpho de Bacchus"  de Diego Velazquez siglo 17.

Bacchus (en latino) o Dionysus era el  dio del vino de la borraches i del teatro en la vendimia.  Uno de los 12 dioses del Olympo, ijo de Zeus i Semele.   Semele no era diosa ma solo una mitad diosa.

Pensi ke una kucharika de Mitologia se asentariya kon plazer allado de este eskrito de  la savor de las uvas.....

I un saludo partikular a  "BOZCADA"   la izla de las uvas i de las vakansyas doradas al norte de la mar Aegea...

[email protected]

 

SIN COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.
Artículo anterior¿Sabías que las clases de Yiddish son un gran regalo? ¡Regala Yiddish esta primavera a tus seres queridos!
Artículo siguienteEncuesta: Likud 29 escaños, la derecha no logra mayoría en la Knesset
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.