Otra vez me se aremeneyaron los rekuerdos de mis anyos kuando no teniya dinguna responsibilitad i me deshava bivir asigun mi buen plazer, allado de mis parientes, felis i sin nada ke me preokupe…. Si… portanto me preokupavan mis profesoras tan eskasas para darmos notas buenas en los egzamenes ! A mi papa no le importava tanto… Saviya ke reusheriya a pasar de klasa en trayendome profesores ke me dariyan lisyones partikulares en kaza… I asi pasaron los anyos…
Una de las kozas ke nunka me vo olvidar era muestros festinos kon mi mamita en la kozina, a las eskondidas de todos ! Komo no eskondermos de las dezgrasyas ke kometiyamos ? No se kualo puediya afitar si mi papa mos viya koroladas de plazer, echandomos komo gatos ambyertos sovre las patatas fritas en la grasa de los pendedvishes i las montanyas de pishkado salado ke arezvaliyamos kon pan salido del orno…. Una lokura i la mijor manera de suisidarse kon la tension, el diabetis, la obezitad, el kolesterol, el kanser, todo lo bueno ke ambezan a los medikos en la Universitad ! Ma no mos murimos… Mizmo si peryi mi mamita kuando eya teniya 48 anyos i yo me kedi komo una borekita fina mis 17 anyos… I dishe “adyos” a los pendevishes i a los pishkados salados i al pan fresko, chokolate, allado de munchos otros alimentos ke danyavan, engodravan i por loskualos me tresaliya… El Di-o me dyo un apetito i una savor en el paladar ke no munchos tienen, orozamente, ma una voluntad de fierro tambien ke me permetyo de aflakarme i tener un puerpo de sirena !
Savesh lo ke son los pendevishes ? Se merkan en el kasap. (carniceria). Mi madre bendicha !! Es la grassa interior pura de la vaka, de la parte de las kostiyas. Se korta en pedasos i se empesa a friyir en una kaldera. La grassa se derrite ma kedan pedasikos sofritikos ke yamamos pendevishes i son muy muy savrozos. En la grassa ke se derrityo friyiamos patatas i sevoyas kortadas a la largor. Metiyamos sal i pimyenta preta i esto era parte de muestros festinos…. Para espidir esto, el karpuz (sandia) era la mijor alternativa !
En akeyos tiempos no era tan importante de ser flakas. Mi granmamita diziya “Dame gudrura te dare ermozura !!! “. Agora las anoreksikas se estan azyendo modelos… Ke tiempos luzyos eran !
Oy en diya de en vezes en kuando, una vez al anyo, sin dizir lo a dinguno, komo una ladrona, traygo un paketiko chiko a kaza i me friyo patatikas avlando kon mi mamita ke me oye de los sielos ! No le plaze tanto ke aga yo pendevishes porke se metyo de akordo kon mi ijo, monsieur el mediko, i me dize ke es koza ke mata la persona por modo de….. Lo ke savemos ! Ke me sale a mi !? No mos vamos a murir ansina o ansina ?
A la buena ora seya….
Yo se una koza. Me eskarinyo de estos pendevishes de mi chikes i punto !
No oyitesh nada.. OK ?
Artículos Relacionados: